Psa 27 | PMA | STEP | Ahi Asuv, kei vi meneai minau ka mutut nau. Sakini, narmetautei en meatin sav tai. Kei kur koe nau en tounah koa vasut nau. ?Sakini, mametaunsa?

Psalms 27

Hisien ten Masmasien

1 Ahi Asuv, kei vi meneai minau ka mutut nau.
Sakini, narmetautei en meatin sav tai.
Kei kur koe nau en tounah koa vasut nau.
?Sakini, mametaunsa?

2 Navong meatin tisa keil umai avit avouas nau ka asak visi mamat;
Ahi hesakin nau nilikat keil, ka keil ilohosai ka isavoi, keil imotmot varei en sise.
3 Mukos vangi meatin tavaeen umai aka rahit nau,
tinok romaleileitei.
Munak koakeil alele tisa enau amea avit avahu vatal minau,
desien onak en Ahi hermottei.

4 Tounah tai, navis Ahi veni;
keinges ekvati.
Ekvatimok nitos en Eim Votut onen
lises en moulien onak.
En out enek, metok hel en Ahi onak, en more nan lises,
ka nihisi ven kataunien onen.
5 En avong takeih, inau nito ni Ahi.
Kei kur koe nau en Eim Votut onen
ka kur revi nau en out tai tetahos.
6 Hesakini, niloh lin koakeil avit avahu vatal minau.
Nisan sanien keil min Ahi Asuv hetal min hisohisoen ten sien;
nisau mini ka nimasmasi.

7 !Ahi Asuv, kitaengon nau navong navisok!
!Emhemahis nau li, ka kisan aneite ten hisien keil onak!
8 Tinok raengonuk navong kovit, “!Kimai venau!”
Sakini, en tinok, numai venuk ka navisuk.
9 Konato suaitei ranau.
Konavuroh kattei inau, konalei seseintei inau, eisisil onom.
Ahi koa mutut nau, mulamu, kokataunau;
konalokoveintei nau li nanato sasok.
10 Vahesa tata onak keilu mama onak lulokoveinau;
ka keik, Ahi Asuv, kilei kat revi nau.
11 Ahi Asuv, kihiseinau en asa koa emvati moumoni;
ka kilamunau en sise koa meatin tisa keil areingeingeni avousil inau eni.
12 Konamaentei inau min meatin tisa keil enek.
Keil aselus karen inau en liluvosien, ka lises avit avouas inau.
13 Ka asakras, veni nakilea keke nimoul
niles tahosien keil onen Ahi.

14 !Kami miheling desien onami en Ahi Asuv!
!Mihehat kami hekeih, minandemkotei!
Anatin, miheling desien onami eni.